Als wer noch Kenger woare, woare wer op en Stroat to huus, wo vüel Kenger levde. So koam et, dat die Jruete emmer kleen Jeschwister an de Klepp haue, op di man oppasse moß. Wenn ener möt ene Ball oder e Selke oder Jlanzbelder ut et Huus jing, woar janz flott en jruete Koppel tesame, on di Kleene dorfte „vor de Hongert” mötlope.
Ens hant wer Versteäke jespelt, on jeder e joot Versteck jefonge. An deä Dach hot min Mutter jewäsche on di Kellerdüür stong op, domöt deä Schwaam aftrecke konnt. Dat isere Öfke, wo di Wäsch drop heet jemäkt woar, woar utjejange. Alle kenger woare jefonge, bloß e Mädche leet sich einfach net fenge. Wer hant jerope on jesökt, avver Hilde woar weg, bis min kleene Schwester ene laute Schrei ding on knietewett ut deä [Keller] koam. Mama on en Nobbersfrau koame jespronge om to kieke, wat los woar. Doa soat Hilde in en Döschdeck mot Blömkes drop injewekkelt op deä Oave on woar met Ärm on Been am fuchtele on met janz deepe Stimm am senge: „Ich bin der Geist, ich bin der Geist, der jeden in den Hintern beißt.“
Mama hät dann schnell di Kellerdüür wier tojemäkt, on dat Jespäns, wat os so bang jemäckt het, lachte os uut on hoalet e Selke för to sprenge.
(hj)